ГУРЕЗ ИБРОҲИМОВ-РИСОЛАТМАНДЕ ДАР ХИДМАТИ ИЛМУ МАОРИФ

(Ба ифтихори фаъолияти илмӣ ва педагогии дотсент Иброҳимов Грез)

Мардумони донишманд мегӯянд: «Омӯзгорӣ ҳамон касбест, ки аз он тамоми пешаҳои дигар сарчашма мегиранд». Воқеан ҳам, маҳз омӯзгор аст, ки ба кӯдакон хондан меомӯзад, ба ҷавонон роҳ нишон медиҳад ва барои ояндаи дурахшони миллат замина мегузорад ва ӯ ба мисли чароғ роҳи тираи зиндагии шогирдонро равшан мегардонад.

Яке аз чунин шахсиятҳои арзанда, ки тамоми умрашро ба илму маърифат бахшида, садҳо шогирдро тарбия ва ба камол расондааст, Иброҳимов Грез мебошад. Ӯ на танҳо як омӯзгори асил, балки инсоне бо виҷдони пок, меҳрубон ва масъулиятшинос аст, ки бо кору зиндагии худ исбот кардааст-рисолати омӯзгорӣ вазифаи оддӣ нест, балки як садоқат ва фидокорӣ ва азхудгузаштагӣ барои насли оянда мебошад.

Иброҳимов Грез 3 майи соли 1942 дар деҳаи Ғеши ноҳияи Муъминободи вилояти Хатлон ба дунё омадааст. Зодаи хонадони деҳқон буданаш ӯро аз овони хурдӣ ба меҳнатдӯстӣ ва поквиҷдонӣ одат дод. Пас аз хатми мактаб (1959) ва чанд соли меҳнат дар колхоз, соли 1962 ба Донишкадаи давлатии педагогии Кӯлоб дохил шуд. Солҳои донишҷӯӣ ва хизмат дар сафи Қувваҳои Мусаллаҳи Иттиҳоди Шӯравӣ (1963-1966) ҷаҳонбинии ӯро васеъ намуд.

Аз соли 1969 ба сифати омӯзгори кафедраи педагогика ва психология ба фаъолият шурӯъ карда, то имрӯз беш аз панҷ даҳсола пайваста ба омӯзишу парвариши насли ҷавон машғул мебошад.

Соли 1991 ӯ бо ҳимои рисолаи илмӣ дар мавзуи  «Тарбияи байналмилалии хонандагони синфҳои 5-6 ҳангоми корҳои таълимӣ ва беруназсинфӣ» унвони номзади илмҳои педагогиро соҳиб гардид. Дар тӯли фаъолияти худ беш аз 90 асару мақолаи илмӣ ва методӣ ба чоп расонидааст. Китобҳои ӯ  «Мазмун ва методикаи кори роҳбари синф» (1987), «Коргузорӣ ва роҳбарии педагогӣ ба корҳои тарбиявӣ дар мактабҳои олӣ» (1995), «Афкори иҷтимоӣ ва маорифпарварии мутафаккирони форсу тоҷик» (2012) ва дигар таълифоти методиву илмии устод ба сифати дастур ва роҳнамо барои омӯзгорону муҳаққиқон асари рӯимизист.

Нақши арзандаи Иброҳимов Грез дар тарбияи мутахассисон ва олимони ҷавон шоистаи таҳсину арҷгузорӣ аст. Ӯ намунаи барҷастаи инсоне мебошад, ки бо қалби соф ва нияти нек умри хешро ба тарбияти дигарон бахшидааст.

Яке аз хизматҳои шоиставу пурарзиши устод Иброҳимов Грез саҳми назарраси ӯ дар тарбияи кадрҳои илмӣ мебошад. Бо раҳнамоӣ ва роҳбарии ғамхоронаи ӯ муҳаққиқони ҷавон чун Шарифзода О.П., Назаров Ҳ.С., Холматова М., Саодати Р., Абдуллоҷони М. ва дигарон тавонистанд рисолаҳои номзадии худро бо муваффақият дифоъ намоянд. Имрӯз онҳо дар сохторҳои муҳими давлатӣ ва муассисаҳои илмӣ фаъолият дошта, бо дониш, таҷриба ва садоқати касбии худ ба ҷомеа хидмат мекунанд.

Ин дастовардҳо шаҳодати равшани онанд, ки устод Иброҳимов Грез на танҳо омӯзгору олим, балки роҳбари асили илмист, ки дар шогирдон на танҳо дониш, балки масъулият, ахлоқи касбӣ ва руҳи илмҷӯиро парвариш додааст. Ба таъбири хоси худи устод: «Беҳтарин мероси устод - шогирдони соҳибилму босаводанд», ки ин сухан ба тамоми ҳаёту фаъолияти ӯ ҷавобгӯ мебошад.

Фаъолияти  содиқона, пайваста ва арзишманди устод Иброҳимов Грез дар роҳи илму маърифат ва тарбияи кадрҳои баландихтисос аз ҷониби давлат ва ҷомеа шоистаи қадршиносӣ қарор гирифтаанд. Ба далели саҳми бузурги илмӣ ва омӯзгорӣ, устод бо як қатор унвонҳо ва ҷоизаҳо, аз ҷумла бо унвони фахрии «Корманди шоистаи Тоҷикистон» (1999), нишони «Аълочии маорифи Тоҷикистон» (1993), Ифтихорномаи Ҳукумати Ҷумҳурии Тоҷикистон (1995), инчунин бо нишону медалҳои ҷашнӣ ва дигар мукофотҳои давлатӣ сарфароз гардонида шудааст.

Имрӯз, ки Донишгоҳи давлатии Кӯлоб ба номи Абуабдуллоҳи Рӯдакӣ 80-солагии таъсисёбии худро ҷашн мегирад, нақшу саҳми шахсиятҳои барҷастае чун устод Иброҳимов Грез дар таърихи рушду пешрафти он басо арзишманд аст. Ӯ бо заҳмату фидокории хеш дар таҳкими пояҳои илмӣ, тарбияи садҳо мутахассис ва ба камол расондани насли огоҳу соҳибкасб нақши муассир гузоштааст. Ҳар як комёбӣ ва пешрафти ин донишгоҳ, дар вуҷуди хеш, бозгӯкунандаи заҳмату саҳми фарзандони донишпарвари миллат чун устод Грез Иброҳимов мебошад.

Дар ҳақиқат, зиндагӣ ва фаъолияти илмии устод Иброҳимов Грез намунаи равшани инсоният, масъулиятшиносӣ ва садоқат ба касб мебошад. Ӯ бо вуҷуди камолоти илмӣ ва унвонҳои баланди давлатӣ, ҳамеша бо хоксорӣ ва дили гарми устодона дар канори шогирдон буд ва бо таълиму тарбияи чандин насли донишманду боинсоф, ба маорифи тоҷик хизматҳои шоистае намудааст. Ҳар ҷое ки сухан аз омӯзгорони асил меравад, номи устод Иброҳимов Грез бо эҳтиром ва ифтихор зикр мегардад, зеро осори пойдори ӯ на танҳо дар китобу мақолаҳо, балки дар дилу зеҳни шогирдони зиёде сабт гардидааст. Ӯро метавон ба ҳақ, як сутуни устувори маориф ва равшангарои роҳи илму дониш номид.

Шарифзода Одинамо Пирназар-дотсент, муовини ректор оид ба тарбияи Донишгоҳи давлатии Кӯлоб ба номи  ба номи Абуабдуллоҳи Рӯдакӣ