ДОНИШҶӮЁНИ ДОНИШГОҲ ҒОЛИБОНИ МУСОБИҚАИ БАЙНАЛМИЛАЛӢ

Дар партави сиёсати варзишпарваронаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои рушди варзиш ва дастгирии ҷавонони соҳибистеъдод дар кишвар имкониятҳои васеъ фароҳам омадаанд. Самараи ин таваҷҷуҳ иштироки фаъолонаи ҷавонон дар мусобиқаҳои сатҳи ҷумҳуриявӣ ва байналмилалӣ ва ба даст овардани дастовардҳои арзишманд мебошад.

Боиси ифтихор аст, ки ду донишҷӯи курси якуми факултети тарбияи ҷисмонӣ ва омодагии дифои ҳарбии Донишгоҳи давлатии Кӯлоб ба номи Абуабдуллоҳи Рӯдакӣ дар мусобиқаи XXXVIII (38-умин) байналмилалии вазнбардорӣ барои дарёфти ҷоизаҳои Чемпиони Бозиҳои олимпӣ ва чемпиони 4-каратаи ҷаҳон Канибек Осмоналиев, ки рӯзҳои 7-8 моҳи ноябр дар шаҳри Бишкеки Ҷумҳурии Қирғизистон баргузор гардида буд, баромади шоиста намуда, ҳар ду сазовори ҷойи сеюм шуданд.

Салимзода Иброҳим дар вазни 85 кг ва Карчиев Саидшо дар вазни 95 кг бо маҳорати баланд рақибони худро мағлуб намуда, бо медали биринҷӣ ва дипломи мусобиқа қадрдонӣ шуданд.

Раёсати Донишгоҳи давлатии Кӯлоб ба номи Абуабдуллоҳи Рӯдакӣ ин дастоварди назаррасро ба ғолибон, устодону мураббиёни онҳо самимона табрик гуфта, дар роҳи варзишӣ барору зафарҳои нав, саломатии бардавом ва пирӯзиҳои боз ҳам бештар дар арсаҳои ҷумҳуриявию байналмилалӣ таманно менамояд.