РӮЗИ ОИЛА ДАР КӮДАКИСТОНИ “СИТОРА”

Имрӯз, 20 майи соли 2026, дар кӯдакистони “Ситора”-и Донишгоҳи давлатии Кӯлоб ба номи Абуабдуллоҳи Рӯдакӣ дар ҳошияи Рӯзи байналмилалии оила, ки ҳамасола 15 май таҷлил мегардад, ҷамъомади фарҳангӣ бо иштироки волидайни тарбиятгирандагон баргузор шуд. Чорабинии мазкур дар фазои идона доир гардида, тарбиятгирандагон бо иҷрои саҳначаҳои ҷолиб, қироати шеърҳо ва барномаҳои фарҳангӣ маҳорати худро нишон доданд.

Дар рафти чорабинӣ масъулини кӯдакистон аз нақши муҳими оила дар тарбияи фарзандон ёдовар шуда, ҳамкории муассиса бо волидайнро омили асосии рушди маънавию ахлоқии кӯдакон арзёбӣ намуданд. Ҳамчунин аз ҷониби маъмурияти кӯдакистон ба волидайни тарбиятгирандагон барои ҳамкории судманд ва мусоидат дар таълиму тарбияи фарзандон сипосномаҳо супорида шуд.