ҚАДРДОНИИ БЕҲТАРИН ИХТИРОЪКОРОНИ ТОҶИКИСТОН

29 ноябри соли 2025 бо ташаббуси Муассисаи давлатии «Маркази миллии патенту иттилоот»-и Вазорати рушди иқтисод ва савдои Ҷумҳурии Тоҷикистон маросими қадрдонии ғолибони Озмуни ҷумҳуриявии «Ихтироъкорон ва навоварони Тоҷикистон» барои солҳои 2023-2024 баргузор гардид. Чорабинӣ бо иштироки намояндагони сатҳи олии ҳукумат, вазорату идораҳо, сохторҳои илмӣ-таълимӣ ва созмонҳои соҳавӣ доир шуда, ҳадаф аз он дастгирии иқтидори зеҳнӣ, тарғиби фаъолияти ихтироъкорӣ ва рушди иқтисоди ба дониш асосёфта арзёбӣ мегардад.

Дар рафти маросим беҳтарин ихтироъкорони кишвар дар асоси қарорҳои ҳайати ҳакамон қадрдонӣ шуданд. Баргузории ҷаласаи пленарӣ ва мизи мудаввар таҳти унвони «Нақши ихтироъ дар таъмини ҳаёти солим» имконият фароҳам овард, ки иштирокчиён андешаҳои илмӣ, таҷрибаҳои амалӣ ва пешниҳодҳои инноватсионии худро пешниҳод намоянд.

Дар миёни сарфарозшудагон Шарипов Анвар Абдурасулович -дотсенти кафедраи психология ва ҳамзамон сардори Раёсати тарбияи Донишгоҳи давлатии Кӯлоб ба номи Абуабдуллоҳи Рӯдакӣ низ қарор гирифт. Ӯ барои пешниҳоди ихтирои худ бо номи «Хотирасанҷ», ки қобилияти санҷиши хотираи инсонро аз 16 ҷиҳат дорост, бо Шаҳодатномаи нишони «Маркази миллии патенту иттилоот» қадрдонӣ гардид.

Ихтирои «Хотирасанҷ» барои истифода дар соҳаҳои илм, таълим ва тиб тавсия шудааст ва ҳамчун абзори муосири арзёбӣ, омӯзиш ва ташхиси равонии инсон аҳамияти баланд дорад. Чорабинии мазкур боз як қадами муҳим дар роҳи рушди ҷомеаи инноватсионӣ ва ҳавасмандсозии истеъдодҳои ҷавон ба ҳисоб меравад.

Раёсати донишгоҳ дастоварди назаррасро ба ҷомеаи меҳнатии муассиса табрику шодбош гуфта, ба муҳаққиқ барору муваффақиятҳои нав орзуманд аст.