ВОХӮРӢ ДАР МАВЗУИ ПЕШГИРИИ ХУШУНАТИ ХОНАВОДАГӢ

Дар доираи ҷараёни «16 рӯзи мубориза бар зидди хушунати хонаводагӣ» дар факултети таърих, ҳуқуқ ва муносибатҳои байналмилалии Донишгоҳи давлатии Кӯлоб ба номи Абуабдуллоҳи Рӯдакӣ бо ташаббуси ташкилоти ҷамъиятии «Наҷоти кӯдакон» вохӯрии омӯзанда бо ҳайати устодон ва донишҷӯён баргузор гардид.

Чорабиниро ҷонишини декан оид ба тарбия, Дӯстов Насим, оғоз намуд. Ӯ меҳмононро хушомадед гуфта, аҳамияти баланд доштани мавзуи мазкурро дар ҷомеаи имрӯза таъкид намуд. Зикр кард, ки огоҳсозӣ ва баланд бардоштани сатҳи маърифати ҳуқуқии донишҷӯён дар масъалаҳои пешгирии хушунат яке аз самтҳои муҳими кори тарбиявии факултет мебошад.

Сипас, намояндагони ташкилоти ҷамъиятии «Наҷоти кӯдакон» Қосимова Қурбонгул ва Раҳматуллозода Фурқат бо маърӯзаҳои муфассалу омӯзанда баромад намуданд. Онҳо дар бораи навъҳои хушунати хонаводагӣ, омилҳои ба он заминагузор, роҳҳои пешгирӣ, ҳифзи ҳуқуқи кӯдакон ва нақши ҷавонон дар баланд бардоштани сатҳи огоҳии ҷомеа ҳарф заданд. Мавдиҳои таҳлилӣ, мисолҳои воқеӣ ва тавсияҳои ҳуқуқӣ аз ҷониби онҳо аз тарафи иштирокчиён бо таваҷҷуҳи хоса пазируфта шуд.

Ҳамчунин омӯзгори факултет, Муродалиев Баҳодур, суханронӣ намуда, тарғиби фарҳанги муколамаи солим, баланд бардоштани масъулияти иҷтимоии ҷавонон ва зарурати риояи меъёрҳои ҳуқуқии оилавиро барои ҷомеаи мутамаддин муҳим арзёбӣ кард.

Дар ҷараёни чорабинӣ донишҷӯён ба саволу ҷавоб, муҳокимаи масъалаҳои мавриди баррасӣ ва мубодилаи фикр ҷалб гардиданд. Ҳамзамон, ба онҳо маводи иттилоотӣ ва тавсияҳои амалии ҳуқуқӣ пешниҳод шуд.