ОИЛА БИДУНИ ХУШУНАТ

Дар доираи баргузории «16 рӯзи мубориза бар зидди хушунати хонаводагӣ» дар Донишгоҳи давлатии Кӯлоб ба номи Абуабдуллоҳи Рӯдакӣ мизи мудаввар таҳти унвони «Оила бидуни хушунат» доир гардид. Дар чорабинӣ устодон, донишҷӯён ва намояндагони сохторҳои дахлдори донишгоҳ иштирок намуданд.

Чорабинӣ бо суханронии муовини ректор оид ба тарбия, дотсент Шарифзода Одинамо оғоз ёфт. Ӯ таъкид кард, ки пешгирии хушунати хонаводагӣ яке аз ҷузъҳои муҳими тарбияи насли ҷавон, таҳкими фарҳанги муросо ва боло бурдани масъулияти шаҳрвандӣ мебошад. Қайд гардид, ки донишгоҳ ҳамеша ҷонибдори ташвиқи тарзи ҳаёти солим, муколамаи созанда ва устувор намудани муносибатҳои солим дар оила мебошад.

Сипас раиси шурои кор бо занон ва духтарони донишгоҳ, дотсент Мирзораҳматова Гулнора, баромад намуда, нақши бевоситаи занонро дар таҳкими суботи оилавӣ ва таҳаммулпазирӣ натиҷагирӣ кард. Вай зикр намуд, ки тарбия, эҳтиром ва ҳифзи ҳуқуқи занону духтарон аз омилҳои калидии ҷомеаи пешрафта ба ҳисоб рафта, муколамаи оилавии солим метавонад аз бисёр баҳсу низоъҳои эҳтимолӣ ҷилавгирӣ намояд.

Дар идома, устодон Табарова Зарторбӣ, Рузиева Барно ва дигар иштирокчиён бо суханрониҳои пурмуҳтаво баромад карда, аз таҷрибаҳои корӣ, муҳимияти баланд бардоштани сатҳи маърифатӣ ва иҷтимоии ҷавонон дар масъалаҳои пешгирии хушунат ҳарф заданд. Онҳо омилҳои пайдоиши муноқишаҳои оилавӣ, роҳҳои ҳал, нақши психологӣ ва зарурати тарғиби омӯзиши ҳуқуқи оилавиро барои ҷавонон баён намуданд.

Дар интиҳо қайд карда шуд, ки баргузории чунин чорабиниҳо барои баланд бардоштани сатҳи огоҳӣ, ташаккули фарҳанги рафтори невобаста аз зӯрӣ ва тарғиби муносибатҳои инсонӣ дар ҷомеа аҳамияти хоса дорад. Чорабинӣ дар фазои созанда, баҳсҳои судманд ва мубодилаи афкори муфид анҷом ёфт.