СЕМИНАР-ОМӮЗИШ ОИД БА ТАҲИЯИ ЛОИҲАҲОИ ГРАНТӢ

Дар Донишгоҳи давлатии Кӯлоб ба номи Абуабдуллоҳи Рӯдакӣ бо ибтикори шуъбаи муносибатҳои байналмилалӣ барои кормандону омӯзгорони муассиса семинар-омӯзиш дар самти таҳияи лоиҳаҳои грантӣ баргузор гардид.

Дар семинар дотсент Сайдалиев Додарбек ҳамчун тренер-машваратчӣ ширкат варзида, нозукиҳои таҳияи лоиҳаҳои грантӣ, аз ҷумла тартиби таҳияи пешниҳод, мақсад ва вазифаҳои лоиҳа, меъёрҳои баҳогузорӣ ва ҳуҷҷатгузории заруриро ба иштирокчиён фаҳмонид.

Ҳангоми баромадҳо миёни иштирокчиён мубодилаи афкор, омӯзиши таҷрибаҳои беҳтарин ва пешниҳод намудани идеяҳои нав оид ба лоиҳаҳо ҷараён гирифт. Ба таъкиди тренер, ҷалби назар ва таҳияи лоиҳаҳои самаранок метавонад барои рушди муассиса, васеъ кардани ҳамкорӣ бо созмонҳои байналмилалӣ ва дастгирии фаъолияти илмӣ-тадқиқотии устодону донишҷӯён мусоидат намояд.

Семинар барои иштирокчиён заминаи муфид дар ҷиҳати боло бурдани сатҳи дониши амалӣ оид ба ташаккули лоиҳаҳои грантӣ ва рушди малакаҳои кории онҳо гардид.