КОНФРОНС. ХУСУСИЯТҲОИ ПЕДАГОГӢ-ПСИХОЛОГИИ ХИЗМАТРАСОНИҲОИ ИҶТИМОӢ БА ШАХСОНИ ИМКОНИЯТАШОН МАҲДУД

Санаи 28-уми ноябри соли 2025 дар Донишгоҳи давлатии Кӯлоб ба номи Абуабдуллоҳи Рӯдакӣ бо ташаббуси кафедраи таҳсилоти томактабӣ ва кори иҷтимоии факултети омӯзгорӣ ва фарҳанг конфронси ҷумҳуриявии илмӣ-назариявӣ дар мавзуи «Хусусиятҳои педагогӣ-психологии хизматрасониҳои иҷтимоӣ ба шахсони имконияташон маҳдуд» бо иштироки коршиносон, олимону донишмандон аз муассисаҳои таҳсилоти олии касбӣ, ҳайати профессорону омӯзгорон ва донишҷӯёни донишгоҳ баргузор гардид.

Кори конфронс бо садо додани Суруди миллӣ оғоз ёфт. Масъулияти пешбурди кори ҳамоишро сардори Маркази матбуоти донишгоҳ Муҳаммадҷони Абдувоҳид бар зимма дошт.

Конфронс бо сухани ифтитоҳии муовини ректор оид ба тарбия, дотсент Шарифзода Одинамо оғоз гардида, таъкид намуд, ки дастгирии шахсони имконияташон маҳдуд на танҳо самти муҳими сиёсати иҷтимоии давлат, балки қарзи инсонии ҳар як шаҳрванди ҷомеа ба ҳисоб меравад. Ӯ гуфт, ки рушди хизматрасониҳои иҷтимоӣ, фароҳам овардани шароити баробар дар таҳсил, ҷалби онҳо ба ҷомеа ва муносибати инсондӯстона аз муҳимтарин омилҳои баланд бардоштани сифати зиндагии ин қишри ҷомеа мебошанд. Ба таъкиди ӯ, омӯзиши илмии ин равандҳо ва дарёфти роҳҳои самараноки дастгирӣ барои такмили сиёсати иҷтимоӣ ва барномаҳои давлатӣ аҳамияти хоса дорад.

Дар идомаи ҳамоиш Маҷидова Бибиҳафиза, доктори илмҳои педагогӣ, профессори кафедраи таҳсилоти фарогири Донишгоҳи давлатии омӯзгории Тоҷикистон ба номи Садриддини Айнӣ, дар мавзуи «Таҳсилоти фарогир ва пайёмадҳои он» баромад намуда, иброз дошт, ки таҳсилоти фарогир имконият медиҳад, то кӯдакон бо сатҳҳои гуногуни имкониятҳо таҳсил намуда, дар муҳити умумӣ рушд ёбанд. Ӯ махсусан қайд кард, ки сиёсат ва таҷрибаи таҳсилоти фарогир яке аз нишондиҳандаҳои муҳими ҷомеаи мутамаддини асри XXI мебошад.

Сипас, Иззатова Муҳаббат, доктори илмҳои педагогӣ, профессори кафедраи таҳсилоти томактабӣ ва кори иҷтимоии Донишгоҳи давлатии Кӯлоб ба номи Абуабдуллоҳи Рӯдакӣ, дар мавзуи «Таҳсилоти фарогир-самараи истиқлол» баромад карда, таъкид намуд, ки маҳз дар даврони соҳибистиқлолӣ заминаи қонунӣ ва методии дастгирии кӯдакони имконияташон маҳдуд пурра такмил ёфта, барои фароҳам овардани муҳити мусоид дар муассисаҳои таълимӣ тадбирҳои назаррас роҳандозӣ шуданд.

Садирова Шарифовна, номзади илмҳои педагогӣ, муаллими калони кафедраи педагогика ва психологияи Донишгоҳи давлатии Данғара, дар мавзуи «Кӯдакони имконияташон маҳдуд муҳтоҷи дастгирӣ ва ғамхории ҷомеа» суханронӣ намуда, зикр кард, ки ташаккули муносибати дурусти ҷомеа нисбат ба ин қишри аҳолӣ, дастрасӣ ба хизматрасониҳои босифати иҷтимоӣ, ҷалби онҳо ба муҳити таълимӣ ва фароҳам овардани имкониятҳои баробар яке аз омилҳои муҳими пешгирии табъиз ва гусастагӣ аз ҷомеа мебошад.

Баромадкунандагон зикр намуданд, ки пешрафти илми педагогика ва психология имкон медиҳад, ки равишҳои нав, усулҳои муассири таълим ва хизматрасонии иҷтимоӣ ба шахсони имконияташон маҳдуд таҳия гардида, ба беҳбудии вазъи зиндагӣ, мутобиқшавӣ ва рушди иҷтимоии онҳо мусоидат намояд.

Кори конфронс нимаи дуюми рӯз дар ду бахш - 1) Педагогикаи умумӣ ва педагогикаи томактабӣ, 2) Психологияи умумӣ ва психологияи бачагона идома ёфт. Дар бахшҳо зиёда аз 40 мақолаи илмии олимону мутахассисон мавриди баррасӣ қарор гирифтанд. Дар ҷараёни муҳокимаҳо масъалаҳои такмили хизматрасониҳои иҷтимоӣ, методикаи кор бо кӯдакони имконияташон маҳдуд, равоншиносии ин гурӯҳи иҷтимоӣ ва роҳҳои татбиқи стандартҳои фарогир муҳокима гардиданд.