ҶАЛАСАИ НАВБАТИИ ШУРОИ ОЛИМОНИ ДДК БАРГУЗОР ГАРДИД

Дар Донишгоҳи давлатии Кӯлоб ба номи Абуабдуллоҳи Рӯдакӣ ҷаласаи навбатии Шурои олимон дар соли таҳсили 2025-2026 баргузор шуд. Дар кори ҷаласа роҳбарияти донишгоҳ, аъзои Шурои олимон, роҳбарони раёсатҳо, мудирони воҳидҳои сохторӣ ва дигар масъулони дахлдор иштирок намуданд.

Ҷаласаро ректори донишгоҳ, дотсент Сафарзода Мунир Ватан ифтитоҳ намуда, рӯзномаи онро ба ҳозирин муаррифӣ кард. Дар баррасии масъалаҳои рӯзнома равандҳои муҳими таълим, корҳои илмӣ-тадқиқотӣ, тарбиявӣ ва ташкилии донишгоҳ дар маркази таваҷҷуҳи аъзои Шуро қарор гирифтанд.

Дар рафти ҷаласа роҳбари гурӯҳи корӣ, дотсент Назаров Ҳотамшо оид ба “Вазъи раванди таълим, корҳои илмӣ-тадқиқотӣ ва ҳуҷҷатгузорӣ дар факултетҳои омӯзгорӣ ва фарҳанг, тарбияи ҷисмонӣ ва омодагии дифои ҳарбӣ” гузориши муфассал ироа намуд. Сипас, сардори раёсати тарбия, Шарипов Анвар “Ҷараёни иҷрои Нақшаи чорабиниҳои донишгоҳро вобаста ба Паёми Президенти Ҷумҳурии Тоҷикистон ба Маҷлиси Олӣ” шарҳ дода, дотсент Муродзода Баҳриддин - сардори шуъбаи муносибатҳои байналмилалӣ, доир ба “Фаъолияти байналмилалии донишгоҳ: ҳолат, мушкилот ва дурнамо” маълумоти зарурӣ пешниҳод кард.

Пас аз муҳокимаи масъалаҳои дар рӯзнома пешбинишуда бо назардошти натиҷаҳои баромадҳо ва пешниҳодҳои аъзои Шуро қарорҳои дахлдор қабул шуда, ба воҳидҳои сохторӣ барои амалисозӣ ирсол гардиданд. Дар бахши масоили ҷорӣ ҳамчунин пешниҳодҳои муовинони ректор ва роҳбарони раёсатҳо баррасӣ гардида, роҳҳои беҳтар намудани фаъолияти ташкилӣ муайян карда шуданд.

Дар анҷоми ҷаласа ректори донишгоҳ, дотсент Сафарзода Мунир Ватан вазифаҳои мушаххасро ҷиҳати таҳкими раванди таълиму тарбия, боло бурдани сатҳи корҳои илмӣ-тадқиқотӣ, ҷалби бештари донишҷӯён ба ҳаёти иҷтимоӣ, фарҳангӣ ва маънавии донишгоҳ, инчунин вусъат бахшидани корҳои тарбиявӣ ба масъулон супориш дод. Роҳбарияти донишгоҳ таъкид намуд, ки тамоми фаъолиятҳо бояд мутобиқ ба талаботи замони муосир ва ҳадафҳои стратегии соҳаи маориф амалӣ карда шаванд.