СОЛИ НАВИ ТАҲСИЛРО БО ДАСТОВАРДҲОИ НАЗАРРАС ОҒОЗ МЕНАМОЕМ

28 августи соли 2025 дар Донишгоҳи давлатии Кӯлоб ба номи Абуабдуллоҳи Рӯдакӣ ҷаласаи аввалини Шурои олимон дар оғози соли нави таҳсили 2025-2026 баргузор гардид. Дар ҷаласа, ки бо иштироки роҳбарияти донишгоҳ, ҳайати Шурои олимон ва масъулони сохторҳои гуногуни муассиса доир гардид, аз рӯйдоди муҳим ва рӯҳиябахш ёдовар шуданд.

Дар ҷаласа ректори донишгоҳ, дотсент Сафарзода Мунир Ватан аз дастоварди арзишманди кормандону донишҷӯёни донишгоҳ, ба даст омадани Нахустпатент ба ихтироъ бо номи “Мошинаи ғалашӯии “АгроТаҷ””  ёдовар гардида, онро дастоварди ифтихорангез дар остонаи соли нави таҳсил арзёбӣ намуд.

Дар фазои тантанавӣ Шаҳодатнома ва Нахустпатент аз номи Вазорати рушди иқтисод ва савдои Ҷумҳурии Тоҷикистон ба муаллифони ихтироъ: Назаров Аминҷон, директори Парки технологии донишгоҳ; Исоева Фариза, магистранти курси 2-юми ихтисоси биология ва Шарипов Аламшо, номзади илмҳои техникӣ, мудири кафедраи илмҳои компютерӣ расман супорида шуд.

Ректори донишгоҳ дастоварди ин гуруҳи устодонро на танҳо ҳамчун як муваффақияти шахсӣ, балки чун туҳфаи арзанда ба ифтихори ҷашни 80-солагии донишгоҳ ва оғози соли таҳсили 2025-2026 арзёбӣ намуда, таъкид дошт, ки ин гуна пешравиҳо омили таҳкими нуфузи донишгоҳ дар арсаи илм ва технология мебошанд.

Ҳайати роҳбарият ва иштирокдорони ҷаласа ин дастоварди илмӣ ва ихтироъкориро бо кафкӯбиҳои самимӣ истиқбол гирифта, изҳор доштанд, ки иқдоми мазкур барои дигар кормандон ва донишҷӯёни донишгоҳ намунаи ибрат ва рӯҳияи илҳомбахши илмӣ хоҳад буд.