БАРГУЗОРИИ ҶАЛАСАИ НАХУСТИНИ ШУРОИ ОЛИМОНИ ДОНИШГОҲ ДАР СОЛИ ТАҲСИЛИ 2025-2026

Имрӯз, 28 августи соли 2025, дар Донишгоҳи давлатии Кӯлоб ба номи Абуабдуллоҳи Рӯдакӣ ҷаласаи аввалини Шурои олимон дар оғози соли нави таҳсили 2025-2026 бо иштироки роҳбарияти донишгоҳ, ҳайати Шурои олимон ва дигар масъулони сохторҳои муассиса баргузор гардид, ки  дар он масъалаҳои калидии марбут ба соли нави таҳсил мавриди баррасӣ қарор гирифтанд.

Ҷаласаро ректори донишгоҳ, дотсент Сафарзода Мунир Ватан оғоз намуда, дар сухани муқаддимавии худ ҳайати Шуро ва тамоми кормандони муассисаро бо фарорасии соли нави таҳсил табрику шодбош  гуфт. Ӯ баён дошт, ки ҳар соли таҳсил як зинаи нав дар рушди донишгоҳ ва бозтобе аз саъю талошҳои пайвастаи аҳли таълиму тарбия аст. Ректор аз ҳайати омӯзгорону кормандон даъват ба амал овард, ки дар соли нави таҳсил бо масъулияти бештар, рӯҳияи баланди ватандӯстӣ ва такя ба таҷрибаи илмии устодони таҷрибадору соҳибмактаб дар пешбурди ҳамаи ҷанбаҳои фаъолияти донишгоҳ саҳми назаррас гузоранд.

Дар ҷараёни ҷаласа нақшаи кори донишгоҳ барои соли таҳсили 2025-2026 баррасӣ гардида, аз ҷониби аъзои Шуро ҷонибдорӣ ва тасдиқ шуд. Дар он самтҳои афзалиятнок, аз ҷумла баланд бардоштани сифати таълиму тарбия, рушди корҳои илмӣ-тадқиқотӣ, ҷалби донишҷӯён ба корҳои илмӣ ва вусъати равандҳои рақамикунонӣ ба таври мушаххас зикр гардида буданд.

Ҳамчунин, сатҳи омодагии сохторҳои донишгоҳ, аз ҷумла факултетҳо ва кафедраҳо ба оғози соли таҳсил мавриди муҳокима қарор гирифт. Гузориши муовинони соҳавии ректор дар ин замина шунида шуда, доир ба тадбирҳои амалӣ барои беҳсозии фазои таълим, мукаммалсозии маводи методӣ ва танзими самтҳои корӣ маълумот пешниҳод гардид.

Яке аз мавзуъҳои марказии ҷаласа омодагӣ ба баргузории чорабиниҳои муҳими маърифатӣ ва миллӣ, аз ҷумла “Дарси сулҳ”, таҷлили “Рӯзи дониш”, Истиқлоли давлатии Ҷумҳурии Тоҷикистон ва 80-солагии донишгоҳ буд. Таъкид гардид, ки ин санаҳои таърихӣ бояд бо тантанаи сазовор ва дар сатҳи баланди ташкиливу сиёсӣ таҷлил шаванд.

Ректори донишгоҳ дар поёни ҷаласа супоришҳои мушаххас, аз ҷумла, ҷиддӣ ба роҳ мондани раванди таълиму тарбия, таҳкими фаъолиятҳои илмӣ-тадқиқотӣ, ҷалби донишҷӯён ба ҳаёти фарҳангию маънавии донишгоҳ ва вусъати корҳои тарбиявӣ бо дарназардошти талаботи замони муосир ва вазифаҳои муҳимро барои  соли таҳсил ироа намуданд.  Таъкид шуд, ки тамоми ҳайати омӯзгорон бояд дар самти иҷрои ин вазифаҳо масъулиятшинос ва ташаббускор бошанд.