ДДК. САҲНАИ ИТТИҲОДИ НЕРУҲОИ ҶАВОНОН ВА ВАРЗИШ

Дар фазои руҳбаланду ороста ва бо нидои умед ба фардо, Донишгоҳи давлатии Кӯлоб ба номи Абуабдуллоҳи Рӯдакӣ, ки имрӯз ба нишони ифтихори илму хирад ва маркази ташаккули арзишҳои миллӣ табдил ёфтааст, исбот намуд, ки варзиш ва маориф метавонанд якҷо на танҳо ҷомеа, балки ормонҳоро низ муттаҳид созанд.

Конференсияи интихоботии Федератсияи футболи минтақаи Кӯлоб-як чорабинии сатҳи баланд, ки имрӯз (22.04.2025) дар ин боргоҳи илму маърифат баргузор гардид, нишонаи возеҳи нуфуз ва эътимоди афзояндаи ҷомеа ба донишгоҳ ҳамчун як маркази воқеии ташаккули афкори иҷтимоӣ ва рушди иқтидори ҷавонон мебошад.

Зимни баргузории Конференсияи интихоботӣ дар натиҷаи овоздиҳии ошкорои вакилон раиси шаҳри Кӯлоб Назарзода Бахтиёр Худоёр раиси Федератсияи футболи минтақаи Кӯлоб интихоб шуд.  Инчунин Шарифзода Муҳаммадзариф муовини якуми раиси Федератсияи футболи минтақаи Кӯлоб ва Назирмадов Дилшод муовини раис интихоб гардида, ба ҳайати нави Кумитаи иҷроияи Федератсияи футболи минтақаи Кӯлоб 15 нафар ба сифати аъзо шомил шуданд.

Баъд аз эълони натиҷаи овоздиҳӣ Сайвалӣ Дониёрзода- ноиби президенти Федератсияи футболи Тоҷикистон, роҳбарияти нави Федератсияи футболи минтақаи Кӯлоб ва аъзои Кумитаи иҷроияро дар ин маснад табрик гуфта, ба онҳо дар амалӣ намудани нақшаву ҳадафҳо ҷиҳати рушди футбол дар минтақа музаффарият тамнно намуд.

Лозим ба таъкид аст, ки бо таъсири сиёсати варзишпарваронаи роҳбарияти олии кишвар, ки ҳамеша бо чеҳраи бозу дили кушода ҷавононро ба варзиш, таҳсил ва созандагӣ раҳнамоӣ мекунад, ин конференсия на танҳо рӯйдоди ташкилии варзиш, балки паёми умед, ваҳдат ва ҳаракат ба ҷониби пешрафт ва ё Тоҷикистон ба пеш буд.

Зимни баргузории чорабинии сатҳи баланд ҳар пораи фазои донишгоҳ-толорҳо, саҳнаҳо ва ҳатто гӯшаҳои хомӯш - имрӯз ба ҷойи гуфтугӯи хирадмандона ва андешаҳои ҷиддӣ дар мавриди ояндаи футболи минтақа табдил ёфт. Он чӣ рӯй дод, танҳо як чорабинии варзишӣ набуд - ин як ҳамоиши арзишҳо, ормонҳо ва ҳувияти миллӣ буд.

Мусоидати донишгоҳ ба баргузории чунин рӯйдодҳои муҳими иҷтимоӣ, бешубҳа, бозгӯи садоқати он ба татбиқи сиёсати Пешвои миллат ва масъулияти он ҳамчун як ниҳоди пешоҳанги маърифат дар ҷомеа аст. Имрӯз Кӯлоб, тавассути ин донишгоҳ, на танҳо илму ҳунар, балки ирода ва нерӯи ҷавононро намоиш дод-нерӯе, ки метавонад футболро аз як бозӣ ба як ҳаракати иҷтимоӣ табдил диҳад.

Баргузории конференсияи интихобии Федератсияи футболи минтақаи Кӯлоб дар ин ҷо – бозгӯйи он аст, ки Донишгоҳи давлатии Кӯлоб дар радифи муассисаи таълимиву илмӣ, макони бедоршавии андеша, эҳёи ормонҳо ва оғози бовар ба фардои дурахшон аст.

Рӯзномаи “Анвори дониш”