Дар факултети филологияи тоҷик ва журналистикаи Донишгоҳи давлатии Кӯлоб ба номи Абуабдуллоҳи Рӯдакӣ ба муносибати Рӯзи модар ва бо мақсади рушди маърифат, фарҳанг ва ҳунарҳои миллӣ озмуни маърифатӣ-фарҳангӣ таҳти унвони "Маликаи факултет-2025" баргузор гардид. Дар озмун садорати факултет, ҳайати омӯзгорон ва донишҷӯён иштирок доштанд.

Озмун бо суханронии декани факултет, Зулфиев Гадомад, оғоз гардид. Зимни баромади худ аҳамият ва моҳияти баргузории ин гуна озмунҳоро таъкид намуда, онро ҳамчун василаи таҳкими анъанаҳои миллӣ ва рушди маҳорати эҷодию фарҳангии донишҷӯён арзёбӣ намуд.

Озмун аз рӯи 7 шарт гузаронида шуд, ки ҳар яке ҳунар ва истеъдоди иштирокчиёнро ба намоиш гузошт:

1. Саломнома – иштирокчиён бо матнҳои зебо ва шевои тоҷикӣ худро муаррифӣ карданд, ки ин нишонаи маҳорати суханварӣ ва эътимод ба худ буд.
2. Қироати порчаҳои шеърӣ ё тарона дар васфи модар – иштирокчиён бо ҳиссиёти баланд шеърҳо ва таронаҳои пурмазмунро дар васфи модар қироат ва иҷро намуданд.
3. Тайёр кардани хӯриш ё буридани отала – духтарон маҳорати худро дар омода кардани таомҳои миллӣ, аз ҷумла буридани отала ва омода намудани хӯришҳои гуногун нишон доданд.
4. Ороиши мӯи сар – ҳар як иштирокчӣ бо ороиши зебои мӯйи сар санъати зебоӣ ва нигоҳубини мӯйро намоиш дод.
5. Намоиши либосҳои миллӣ – духтарон бо пӯшидани либосҳои миллӣ, ки рамзи фарҳанги бойи тоҷикон аст, ҳусну латофати худро ба намоиш гузоштанд.
6. Суруди алла хондан – бо овози нарму гуворо ва ҳиссиёти гарму самимӣ сурудҳои алларо иҷро намуда, муҳити озмунро боз ҳам самимитар сохтанд.
7. Рақси якка – иштирокчиён бо иҷрои рақси якка маҳорати ҳунарии худро нишон доданд ва бо ҳаракатҳои дилфиреб шукуҳи фарҳанги миллиро таҷассум намуданд.

Пас аз ҷамъбасти озмун, "Маликаи факултет-2025" муайян гардид ва аз ҷониби садорати факултет бо тоҷ ва сипоснома сарфароз гардонида шуд. Дигар иштирокчиёни озмун низ бо сипоснома қадрдонӣ шуданд, ки ин нишонаи арҷгузорӣ ба ҳунар ва меҳнати онҳо буд.

Баргузории чунин озмунҳои фарҳангӣ на танҳо ба рушди истеъдод ва эҷодкории донишҷӯён мусоидат мекунад, балки онҳоро ба арҷгузорӣ ва эҳтироми фарҳанги миллӣ ҳидоят менамояд.